Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-479 --
Illic uxoremque meam, natumque reliqui
Infantem, conferta omni et penetralia gaza:
Attamen heic hortorque meos, sumque ipse paratus
Cominus ire viro, quanquam intra moenia Trojae
Nil habeo, quod ferre queant, vel ducere Graji.
Tu contra, stasque ipse, tuam nec ductor in arma
Saltem acuis pubem, gnatisque hortare, larique
Ferre suo auxilium; duris ne more ferarum
Cassibus implicitos, praedam, et ludibria Graji
Vos faciant, et vestra solo jam moenia vertant. 580
Haec te mente decet noctes versare, diesque;
Et precibus socios blandis ambire, labori
Ne duro parcant; concordi et moenia nisu
Ut positis pergant odiis, rixaque tueri.
Talia Sarpedon. dictis perstrictus amaris
Indoluit, curruque in terram desilit Hector,
Atque manu crispans praefixo hastilia ferro,
Hac illac celeri pede cursat flammeus omnes
Per cuneos, passimque acres hortatibus iras
Suscitat, ac pugnae mentes incendit amore. 590
Continuo firmantque aciem, conversaque in hostem
Arma ferunt densi. quos contra Argiva juventus
Densa manet, nec terga fugae conterrita vertit.
Ac veluti stipulasque leves, culmosque volantes
Flabra ferunt, fortes jaciunt cum trita coloni
In ventos frumenta, Ceres et flava solutam
Secernit frugem paleis; denso area circum
Sacra acere, et vacuis ingens albescit aristis:
Haud aliter Grajae sublato pulvere turmae
Albescunt, crebro quem suscitat ungula pulsu 600
In mediis, caeli undantem sub caerula, postquam
Convertere aciem, flexitque auriga jugales.
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
