Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-422 --
Vult aliquam dum more suo perpellere, Troas,
Omni quos studio fovet, ut fugitiva sequatur,
Dumque manu mulcet cunctantem, fibula mollem
Incautae laesit perstringens aurea dextram. 510
Sic ait: at divum risit pater atque hominum rex,
Et Venerem vocat ad sese, dehinc talia fatur.
Nil tibi cum bello est, mea gnata, et fortibus armis.
Tu molles thalamos, laeta et connubia cura;
Arma ferus tractet Mars, et Tritonia Pallas.
Haec inter sese dī celsa in sede loquuntur.
Acer at indomito Diomedes marte premebat
Aenean; dextra ingenti quem Phoebus Apollo
Protegit. ille, deum haud veritus, magis et magis instat,
Ac vita spoliare virum festinat, et armis. 520
Ter saevus ferro contra irruit: ipse ruenti
Ter dextra clypeum fulgentem torvus Apollo
Reppulit. at, quartum magna cum turbidus ira
Insiluit, voce increpitum sic terruit altum
Inclamans, diroque jubens desistere coepto.
Parce ausu, vesane; pedem refer, atque deorum
Ne gere te similem tumefacto corde: virūm gens
Reptat humi; superi colimus caelestia templa.
Sic ait ille. gradum absiliens retro tulit heros;
Atque sagittiferi vitavit numinis iram. 530
At Deus Aeneam turbaque exemit Achiva,
Pergameaque locans raptum deponit in arce,
Stant ubi pulchra deo, sacrisque calentia templa.
Aeneam Latona parens, et laeta sagittis
Exceptum sacra curabat in aede Diana.
Arcitenens tenuem Aeneae sine corpore formam
Ipse suis finxit manibus, vultuque habituque
Assimilem verae, et cinctam fulgentibus armis.
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
