Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- Homer-v-482 --
Ille cadit, stratusque immundo in pulvere leto
Occubat. Ad ripam stagni ut prognata liquentis 540
Populus enodi trunco, celsoque virentes
Fronde nova ad caelum fundens in vertice ramos:
Quam faber, apta parans ingenti orbilia curru,
Fulgente aggressus ferro succidit: ad undam
Illa jacet vitaque carens et frondis honore:
Sic juvenem stravitque Ajax, atque exuit armis.
Ast hunc Priamides telo petit Antiphus acto
Eminus e turba; sed, dextra errante, sodalem
Magnanimi Laërtiadae ferit hasta, sub imo,
Leucum, ventre, manu exanimum male cautus utraque 550
Dum trahere instabat corpus. frigensque cadaver
Excidit e manibus, moribundo corpore et ipse
Corruit, atque eadem largo rigat arva cruore.
Tum vero immanes Ithacae rex arsit in iras,
Perque viros, perque arma ruit fulgente coruscus
Aere, ipsis Troum dum se prope miscuit audax
Ordinibus; quassatque hastam, multoque micantes
Igne oculos circum fert turbidus: agmine Troes
Turbato cessere, virum ut videre reductā
Tela manu librare: nec effugit irrita, figit 560
Hasta nothum Priami sed Democoonta, paternas
Qui miser ad sedes e parva missus Abydo
Venerat, armentis illic praefectus equarum.
Huic Laërtiades, iratus morte sodalis,
Percussit medium ferrata cuspide tempus,
Fixo aliud quae per tempus trajecta cerebro est.
Nigra oculos juveni densa nox contegit umbra.
Corruit; ingentem sonitum super arma dedere.
Trojugenum turbata acies, conterritus ipse
Hector: at Argivi laeto clamore trahuntque 570
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
