Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-109 --
Celsa bis octonos: quae multa sedulus arte
Levavitque faber, fulvoque inclusit in auro
Hinc apices atque hinc geminos. hunc protulit heros,
Contendensque manu solerti acclinat ad ipsam
Tellurem. scutis regem texere sodales
Condensi; Grajūm pubes consurgere in arma
Ne prius inciperet, saevo quam missile ab arcu
Effugiens certo Menelaum figeret ictu. 130
Inde manu pharetramque aperit, volucremque sagittam
Deligit, haud unquam missam, durosque nitenti
Sub ferro luctus, et vulnera saeva gerentem.
Hanc ubi deprompsit, nervoque aptavit equino,
Vota facit Phoebo, Lycia qui cretus in alta est,
Primigenam agnorum sobolem praepinguia sacra,
Spondens, cum patriam remearit victor ad urbem.
Inde arcum laeva tenuit, dextraque sagittam
Cum nervo adduxit pariter, dum tangeret ipsa
Arcum acie ferri; dextra, nervoque papillam. 140
Protinus insonuere aurae, fugitque volucre
Horrendum stridens medios telum inter Achivos.
Nec te dī expertem auxilii, Menelaë, potentis
Immemores liquere tamen; non filia magni
Magna Jovis. telum pro te stans depulit ultro
Illa manu letale, inhibens a corpore: muscam
Mater ut instantem pueri cum pellit ab ore,
Dum media placidum carpit de luce soporem.
Diva manu telum flexit, qua fibula balteum
Aurea mordebat, thorax qua se objicit ingens 150
Aere rigens duplici: sed magni textaque baltei,
Thoraca et geminum pervasit ferrea cuspis,
Et quae subter erat, firmum tela omnia contra
Munimen, lamnam. qua vis infracta morante
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
