Croatiae auctores Latini: inventa |
domum | quaere alia! | qui sumus? | index auctorum | schola et auxilia | scribe nobis, si corrigenda inveneris! |
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml]. Si vis in lexico quaerere, verbum elige et clavem 'd' in claviatura preme.
HOMERI ILIADOS LIBER QUARTUS
Di Jovis interea tecto in stellante sedebant, Auro ubi clara micant penetralia: nectar at Hebe Miscebat formosa. illi, dum pocula in orbem Traduntque, accipiuntque manu, Trojana tuentur Moenia, et instructas prato in florente phalanges. Talibus heic dictis Junonem incessere coepit Jupiter, atque joco Veneri conferre molesto: Vsque favent geminae flavo divae Menelao, Juno Argiva, potens et bello Pallas; at ambae Secretaeque sedent longe, gaudentque tuentes 10 Praelia nequidquam. contra festiva Diones Filia semper adest Paridi, praesensque repellit Fata viro, quem nunc medio e discrimine leti Eripuit, patriasque ferens avexit in aedes. Certa tamen forti victoria stat Menelao. Nunc, his quem deceat rebus jam ponere finem, Consulite in medium; rursusne incendere tristi Marte animos placeat, sancire an foedera pacis. Hoc si forte placet cunctis, Priamique manebit Urbs, Helenam et patrias ducet Menelaus ad oras. 20 Jupiter haec. tacitae mussant, saevumque furorem Alto corde premunt Juno, et Tritonia Pallas; Quae, mala Trojugenis irato in corde parantes, Contiguae divūm coetu in fulgente sedebant. Nata quidem, indomitus licet intus ferveat atro Felle dolor, nihil ausa tamen patrem hiscere contra:
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml]. |
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Za uporabe koje prelaze okvire ove licence obratite se voditelju projekta.