Nata Jovis magni sensit Venus, ipsaque caelo
Adveniens rupit lorum dea: cassis ahena
At, capite exempto, victorem est sola secuta.
Quam, simul ac vacuam vidit, projecit Achivos
Contortam in medios: socii tellure jacentem
Sustulerunt. ast dira fremens Menelaus in hostem
Irruit; ac magnam quassabat turbidus hastam.
Tum Cypris (nam quid nequeat dea?) protinus illinc
Priamiden longe rapuit, multamque paventi
Offudit circum nebulam; fractumque labore 420
Ipsa suis manibus thalamo in fragrante locavit.
Inde abit, arcessitque Helenam; quam nacta sedentem est
Aëria in turri. dextra, laevaque frequentes
Dardaniae matres aderant. tum diva prehendens
Ambrosium furtim peplum concussit: at ora
Dissimulat, cultumque deae, seque induit astu
Rugosam in vetulae faciem, Lacedaemone lanam
Quae curare illi, prae cunctis grata, solebat .
Huic similis blanda Venus est sic voce locuta.
Nympha, veni ad tua tecta; Paris vocat, ille superbum 430
Ingressus thalamum, formaque, et vestibus aureis
Effulgens: reducem nec dixeris esse cruenti
E medio, pugna functum, certamine Martis:
Verum aliquo ad choream laetum se ferre, relicta
Aut chorea, fessum dulci sedisse labore.
Sic ait: incenditque animum sub pectore. pulchrae
Illa oculos, pectusque, et colla nitentia divae
Agnovit; subitoque adspectu exterrita: Fraudes
Anne alias miserae nectis, dea saeva, parasque
Maeoniaeve aliquam, Phrygiae vel ducere in urbem; 440
Atque alii, si forte virum quem diligis illic,
Tradere me? patrias victor Menelaus in aedes

Vade retro

Vade porro