Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- Homer-v-579 --
Deponunt: tunicam tantum unam, pallia pulchra
Et liquere duo; veste hac ut rite cadaver 700
Traderet ad patrios indutum ferre penates.
Tunc heros vocat ancillas, lymphaque tepenti
Abluere, et pingui perducere corpus olivo
Imperat, ex oculis amotum; cernere posset
Ne Priamus gnatum; tristi ne forte dolore
Percitus infelix genitor cohibere nequiret
Iram animo: subito furiis accensus at ipse
Mactaretque senem, et violaret jussa Tonantis.
Dehinc, ut frigentes lavere oleoque nitenti
Perduxere artus famulae, circumque dedere 710
Artubus et tunicam, pulchro et regalia textu
Pallia; sublatum lecto super ipse locavit
Pelides; gemini et rhedae imposuere ministri.
Tum vero ingentem gemitum dat pectore ab alto;
Et fidum hac lacrimans compellat voce sodalem:
Parce irae, precor, haec nigro si forte sub Orco
Audieris, Patrocle. suo do ferre parenti
Hectora: dona dedit sed non spernenda; tuam tu
Unde feres partem actutum, quam ferre decebit.
Sic ait, ac subiit tentoria rursus Achilles, 720
Conseditque iterum solio, quod liquerat ante,
Adversus Priamo; tum blandus talia fatur:
Jam tibi servitio exemptus, quod nempe rogasti,
Atque toro in molli positus jacet Hector; in ortu
Quem primo Aurorae aspicias referasque licebit
Avectum ad muros. tristem secludere curam
Nunc decet, ac victu vires revocare. nec ipsa
Abstinuit victu Niobe, bissena domorum
Septa intra subito cui strata est funere proles,
Sex nati, ac totidem natae. deus abstulit illos 730
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
