Et medius placido tales dat pectore voces:
Atridae, Grajique omnes, Mavortia pubes,
Haec circo stant in viridi jam dona, manentque
Aurigas. alium si quem nunc propter Achivi 350
Certarent, ferrem celsa ad tentoria munus
Primum ego. nanque mei quam cunctos robore vincant
Scitis equi; leti expertes maris arbiter alti
Quos Peleo patri Neptunus tradidit, ille
Deinde mihi senio fessus concessit habendos.
Ipse tamen maneo, caelesti et semine creti
Alipedes; moerent saeva qui morte perempto
Auriga miti atque bono, qui scilicet illis
Curabatque jubas oleo, puraque lavabat
Corpus aqua, haec propter lugent, terraeque profuso 360
Crine, gemunt alto perfixi corda dolore.
Verum agite, et rapido vos laeti accingite cursu,
Quisquis equis fidit levibus curruque volucri.
Haec ubi sic fatus Pelides, haud mora, surgunt
Aurigae. princeps, Admeti regia proles,
Eumelus celerum solers agitator equorum.
Post hunc magnanimi Diomedes inclyta Tydei
Proles ostendit sese, Phrygiosque sonanti
Curru jungit equos, magno quos abstulit heros
Aeneae, ast ipsum leto subduxit Apollo. 370
Post hunc Atrides surgens flavus Menelaus
Sub juga cogit equos celeres Aethenque Podargumque
Illam Agamemnoniam, proprium hunc. Aethen Echepolus
Olim Anchisiades majori munus Atridae
Praebuit, Iliacas iret ne miles ad arces,
Segnis at in patria vitam oblectaret inertem
Sede manens. magnas dederat nam Jupiter olli
Divitias, laetusque amplam Siciona colebat.

Vade retro

Vade porro