Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-493 --
Quem miseret, praebet cyathum vix parcus, et ora
Prima rigant, siccum nec tangunt vina palatum.
Hunc aliquis vivo florens utroque parente
Mensa abigit plagisque puer, probrisque: Recede,
Non tuus heic; pater est nobis conviva. repulsus
Ille redit matrem ad viduam rorantia fletu
Ora madens. meus Astianax! cari ante parentis
In genibus niveumque adipem, solamque medullam 620
Vesci qui solitus; ludo et cum fessus ocellos
Claudebat, somnum dulci nutricis in ulna
Carpebat strato in molli, puerilia plenus
Pectora deliciis. at nunc duram feret idem
Aerumnam infelix, orbatus patre perempto;
Astianax: puerum sic Troës nomine dicunt.
Quod celsos illis muros tu solus et urbem
Servabas, Hector. nunc primo in litore curvas
Ad naves tua membra, parentibus atque propinquis
Heu procul a caris, vermes pascentur edaces, 630
Dira canum si quid rabies satiata reliquet:
Membra heu nuda! tibi at vestis tenuisque decensque
Multa domi, Iliadum vario perfecta labore.
Quam certum est omnem flagrantibus urere flammis.
Usus erit nullus; nec in illa veste cubabis,
Quam dedero: ast inter Troasque et Troadas esto
Hic tibi bonos rapto crudeli morte supremus.
Hos dedit Andromache moesto de pectore questus;
Et moestae Iliades circum adgemuere gementi.
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|