Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-122 --
Quid si, cum veniam supplex, genibusque furentis
Advolvar, me nil miserans ferus ille, precantem
Nec veritus, ferro armatus invadat inermem;
Tam facile et perimar, mulier quam nescia belli?
Non est qui possit blando sermone moveri,
Nec quicum liceat garrire ac vana jocari: 160
Garrit ut a quercu interdum saxoque puella
Et juvenis. praestat pugnare, ac noscere tandem,
Eximiam laudem cui Jupiter annuat aequus.
Dum tales dubio mutabat pectore curas
Hector, in adversum cursu tendebat Achilles.
Fulmineus veluti Mavors in vertice cristas
Concutiens per bella ruit, sic ille ruebat,
Sublatamque humero quatiebat concitus hastam
Fraxineam, ingentem. totum cui corpus ahena
Luce micat; qualem fundit vel flamma, vel ipse, 170
Ardet ubi Eoo surgens de gurgite, Phoebus.
Non tulit horrendam speciem, non Hector eodem
Sustinuit mansisse loco, Scaeamque reliquit
Immemor a tergo portam. mora nulla, fugacem
Aeacides pedibus melior premit. Ille volantes
Ut quondam ante alias longe pernicior omnes
Accipiter visam aeria de rupe columbam
Insequitur lapsu facili: raptim volat illa,
Obliquatque viam fugiens tremefacta; superstat
Hostis atrox, promitque ungues, et clangit acutum; 180
Dira fames avidum exacuit, praedaeque cupido:
Sic celer Aeacides planta pernice volabat
Igneus; obliquo cursu vitare volantem
Sic frustra optabat patriae sub moenibus Hector
Genua levis jactans. Et jam post terga relictus
Agger erat, surgensque altas caprificus ad auras.
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
