Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-343 --
Si pugnem similes foliis qui nempe vigescunt
Interdum, atque alacres vescuntur munera terrae,
Inde brevi enerves languent pereuntque. cruentae
Nos igitur pugnae parcamus: mutua caedant
Illi se telis, ac pergant cernere ferro.
Sic fatus, retro gressum tulit, ille parentis
Nam fratrem est veritus collata invadere dextra.
Quem simul ac vidit, regno memoranda ferarum,
Silvipotens Dictinna, soror convicia fratri
Fecit, et irato dedit has de pectore voces: 600
Phoebe fugis? laudem Neptuno linquis et omnem,
Atque decus multo quaesitum, ignave, labore?
Cur, demens, arcumque et inania spicula gestas?
Non magnis posthac verbis te patris in aede
Jactantem audiero, jactabas qualia nuper
Inter caelicolas: telis arcuque paratum
Letifero contra Neptunum invadere pugnam.
Sic ait: increpitus nihil at respondit Apollo.
Magna sed immanes conjux Jovis arsit in iras;
Atque, deam probris onerans, haec ore profatur: 610
Quī nam, effrons, ausa es tu me consistere contra?
Durum opus est mecum pugna contendere, quamvis
Auratosque arcus gestanti, et lucida ferro
Spicula. foemineo generi te nempe leaenam
Jupiter attribuit, quam velles et dare leto
Annuit; infestisque Orco demittere telis
In domibus stratas necopina morte puellas.
Nae tibi, diva, feras agitare in montibus altis
Est satius, silvisque vagantes figere cervas,
Quam conferre manum stulte melioribus. at, si 620
Bella tamen tentare placet, pugna ocyus, ut jam,
Noris, ego quanto sim fortior, improba; quae me
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
