Huic hastam caput in medium defixit Achilles,
Inque duas totum crudeli vulnere partes
Diffidit. ille ingens ingenti pondere nigram
Planxit humum. super haec Pelides verba profatur.
Otryntida jaces; dudum qui magnus Achivis
Terror eras. heic mors misero tibi contigit, orto
Gygaei prope stagna lacus, ubi pinguia dives
Rura tibi genitor piscosum liquit ad Hyllum, 450
Hermum et vorticibus rapidis per culta fluentem.
Talia Pelides: olli nox lumina texit,
Atque acie in prima frigentia membra jacentis
Protrivere rotae Danaum. Peleius heros
Pugnacem ante alios Trojanos Antenore cretum
Demoleonta gravi percussit cuspide ad ipsum
Tempus per galeam; nec ferrum cassis ahena
Mergi avidum tenuit: fractum os, vastoque cerebrum est
Vulnere foedatum penitus. Quem dius Achilles
Ardentem ut domuit leto; Hippodamanta, relictis 460
Dum bijugis fugit ante, hasta perfodit adacta
In tergum: ille animam exhalans immugiit, altum
Taurus ut immugit, quem regi Helicona tuenti
Flava manus juvenum vi tractum sistit ad aram;
Gaudet fluctipotens Neptunus. post, ubi liquit
Huic animus nervos atque ossa immane gementi,
Priamiden saeva Polydorum turbidus hasta
Insequitur, similem dis pulchro corpore. Grajis
Haud pater hunc muros extra pugnare sinebat.
Quippe erat et minimus natorum, et carior olli 470
Ante omnes: cursu et nullum non vincere suerat.
Tunc etiam ille, pedes vesana mente volucres
Ostentans, primos studio cursabat inani
Per Troum cuneos dulcem dum perdidit amens
Tandem animam. propter fugienti dius Achilles
Nam telum dorso in medio defixit acutum,
Apta ubi fulgentem nectebat fibula balteum
Aurea, et obstabat duplex ad vulnera thorax.
Hasta gravis ventrem trajecta cuspide ad imum
Exiit: altum ululans duplicato poplite pronus 480
Ille cadit; tenebris nigrescunt omnia, flexo
Corpore, lapsa manu retinenti viscera utraque.
Hector ubi fratrem crudeli vulnere vidit
Confossum, terrae acclinem, sua viscera habentem
In manibus; luctuque animum confusus, et ipsos
Moesta nube oculos caligans, non tulit ultra
Circumagi, saevumque hostem vitare, sed igni
Assimilis magnum contra volat acer Achillem,
Dextra fulgentem quatiens interritus hastam.
Quem simul ac vidit venientem et dira frementem, 490
Exsilit Aeacides, ac laetus talia fatur:
En prope adest, animum qui vir saevo mihi luctu
Fodit: et eximium stravit mihi morte sodalem.
Cominus en conferre manum licet; agmina frustra
Nec cursare inter, vitareque mutua pugnam.
Sic ait; ac torvus compellat voce superba
Priamiden: Ades huc, propiusque accede supremi
Ocyus exitii ad metas. Haud territus Hector
Retulit huic contra: Ne me, Pelida, minaci
Posse puta, ut puerum, terreri voce. peritus 500
Aeque ego probrosis cuivis contendere dictis.
Robore (novi equidem) tu praestas, viribus impar
Sum tibi ego: divum sed res haec scilicet omnis
In manibus; spolier, spoliem te an lumine vitae
Quamvis deterior percussum cuspide. acutum
Et mihi nam ferrum summa est, ni fallor, in hasta.

Vade retro

Vade porro