Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-154 --
Ter pedibus retro apprendens exsangue cadaver
Priamides traxit, socios et voce vocatos
Horrisona increpuit; ter magnis viribus ambo
Ajaces gelido aspulerunt a corpore; fretus 190
Ille suo contra perstabat robore; turbam
Acer et in mediam nunc se, mediumque tumultum
Injicit; immotus nunc stat, magnaque suorum
Voce animos firmat, nusquam decedit et hosti.
Ac velut impastum flammato corde leonem
Pastorum nequeunt vigiles arcere catervae:
Sic gemini Ajaces, Mavortia corda, furentem
Hectora ab exanimi Patroclo arcere nequibant.
Jamque adeo abreptum rapuisset victor, et ingens
Cepisset decus et speratae praemia laudis; 200
Iris ni subito venisset nuncia forti
Pelidae, illa jubens armari ad praelia. caelo
Clam Jove, clamque aliis quam dīs Saturnia misit.
Haec juveni stetit ante oculos, ac talibus infit:
Surge age, Pelide armipotens, omnesque tremende
Ante viros; fer opem Patroclo. nanque carinas
Stat gravis ad curvas dudum pugna illius ergo,
Seque acies caedunt hinc atque hinc: pugnat Achiva
Exsangui pubes pro corpore; Troia certat
Arreptum Iliacas at pubes tollere ad arces. 210
Inclytus ante omnes Hector furit; atque potiri
Exstincto, atque caput molli a cervice resectum
Figere avet summo in vallo. Consurge, jacere
Desine; jam subeat mentem pudor, optime Achilleu,
Te vivo, Iliacis Patrocli membra relinqui
Ludibrium infelix canibus. tibi turpe sodalis
Si veniat lacerumve tui foedumve cadaver.
Sic dea. sic contra Pelides: Iri ferentem
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
