Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-590 --
Sic ait: huic subita mentem et praecordia texit
Nube dolor: fulvo ante aciem volat aere coruscus.
Tum pater auratis Saturnius aegida villis
Sustulit, ac densis late omnem nubibus Idam
Involvit, saevis implens fulgoribus auras;
Horrendumque dedit tonitru, magnaque tremendum
Gestamen dextra concussit, vimque sequendi
Invictam Teucris, trepidamque immisit Achivis
Ipse fugam, et gelidum, perculsa mente, pavorem.
Boeotus fugit ante omnes ac tuta capessit 740
Peneleus, dextrum pugnanti ut strinxit acuto
Polydamas humerum telo; nec vulnus adegit
Altius, ille quidem propior jaculatus. at Hector
Cominus egregium percussit Leïton hasta,
Germen Alectryonis magni, qua jungitur ulnae
Dextra, virum cogens pugna desistere. circum
Lumina qui volvens fugitque exterritus, hastam
Nec jam posse manu tractans confligere Teucris
Sperabat, moerore animum dejectus acerbo.
Hectora, dum sequitur fugientem Leïton, hasta 750
Idomeneus medium ferit in thoraca, papillam
Juxta, sed primo fracta est in robore cuspis
Ima. Phryges, regis perculsi corda periclo,
Exclamant: stantem in curru jaculatus at Hector
Deucaliden, misso regem contingere telo
Haud potuit: magno confossum at vulnere juxta,
Meriona e fidi aurigam armigerumque, peremit
Caeranon; alta, virum comitans, qui moenia Lycti
Liquerat. (hac primum a curvis nam luce carinis
Meriones in bella pedes processerat, ingens 760
Morte sua Teucris decus ille daturus, euntem;
Pone sequens celeres ni Coeranus ante jugales
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
