Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-458 --
His, quamvis cari turbatus morte sodalis,
Automedon vectus ruit inter praelia; qualis
Anseribus vultur mixtus; cursuque volucri
Nunc turba e Teucrūm refugit, nunc rursus eodem
Involat, ac trepidum turbat, verso agmine, vulgus:
At non caede viros sternit, dum terga ruentum
Turbidus insequitur. nec enim sacro licet uni
In curru vibrare hastas, et ducere fraena.
Hunc, luctu attonitus cursu dum fertur inani,
Alcimedon tandem, Laërcei clara propago 580
Aemonidae, vidit; stans et post terga, calentem
Et currum, dictis affatur talibus ultro:
Automedon, istud quisnam tibi futile divūm
Consilium injecit, mentemque exemit? in hostem
Incursas medium solus; cui morte sodalis
Stratus: at Aeacidae gerit Hector clara superbus
Arma humeris, partoque tumens exsultat honore.
Magnanimus contra Automedon huic talibus infit:
Alcimedon, quisnam bellaces inter Achivos
Par tibi nosse animos et mores morte carentum 590
Cornipedum, praeter Patroclum, vivus agebat
Qui prius indomitos par divis: nunc mala Parca
Oppressit miserum, viridique exstinxit in aevo.
Ergo age, lora manu cape tu, longumque flagellum:
Ast ego desiliam curru, pugnamque capessam.
Haec ubi dicta, citum Alcimedon celer insilit axem,
Docta lora manu capiens, longumque flagellum:
Desilit Automedon. quos longe prospicit Hector,
Et lateri adstantem laetus compellat amicis
Extemplo Aenean dictis, ac talia fatur: 600
Belligerae Troum gentis bone ductor, et auctor
Consilii sapiens, Aenea, fortis Achillei.
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
