In CroALa inventa

Invictaque manu, fatali et cuspide Achillei.
Haec fantem involvens nigra mors obruit umbra,
At volucri lapsu membris digressa petivit
Orcum anima, aegra suam sortem flens, atque relictae
Lugens purpureumque decus viresque juventae.
Exanimem hunc, tamen affatur sic inclytus Hector:
Tu mihi triste canis letum, Patrocle; sed ante,
Formosae Thetidis dium genus, altus Achilles
Ipse mea quid si vitam efflet fixus ab hasta?
Sic ait; extraxitque alto de vulnere telum, 1060
Stratum calce premens corpus; retroque supinum
Repulit aerata propulsum a cuspide. quassans
Hinc hastam, cursu rapido petit Automedonta,
Magnanimum Aeacidae famulum, demittere et ipsum
Leto avidus: nati divino at semine, Peleo
Caelestes dederant quos magno in munere divi,
Abstulerunt certa servatum a morte jugales.

LIBER DECIMUS SEPTIMUS
Magnanimum haud latuit Menelaum stratus acerba
Morte Menetiades; claro qui horrendus in aere
Provolat ante aciem primam, gelidumque jacentis
Corpus obit. Qualis partu modo functa recente
Mater obit vitulum, primos tum passa labores
Lucinae, duri nixus ante inscia, proli
Permetuens, querulis implens mugitibus auras;
Talis Patroclum circa bonus it Menelaus.
Proque viro clypeumque ingentem opponit, et hastam
Quassat, morte parans dejectum sternere, quisquis 10
Obvius arma ferat; Panthi sed filius audax,
Patroclum ut vidit stratum celer advolat; ipsum
Et prope stans corpus, Menelaum his increpat ultro.
Atride Menelae, genus Jovis, atque virūm rex,
Istinc cede procul; gelidum ne attinge cadaver.
Exuvias mihi linque cruentas. me prior inter
Praelia Patroclum nemo nam vulnere laesit
Vel Tros, vel socius. victorem praemia pugnae
Ferre sine, in Teucris multa et clarescere laude.
Cede, iterum hinc, moneo, stulta ne mente furenti 20
Eripiam dulcem, transfosso pectore, vitam.
Infremuit, gemituque Atrides talia reddit:
Jupiter ut foeda est ventosae gloria linguae!
Non pantera, leo non efferus, aut aper audax
Dira fremens, tantum spirant; nec pectore tantos
Versant forti animos confisi robore, quanta

Vade retro

Vade porro

Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].