Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-75 --
Cebrionen, Patrocle, audax: nec segnius Hector
Desiluit curru saevis horrendus in armis.
Illi Cebrionae duram de corpore pugnam
Invadunt. gemini quales in monte leones,
Impasti, dirumque frementes, corpore magno
De cervae horrendum rixantur: tristia tales
Patroclusque Menetiades, et Martius Hector
Praelia contulerant de corpore Cebrionai; 930
Alter et alterius vibranti cominus hasta
Bellator medium cupiebat figere pectus.
Exanimum capite arripuit validaque tenebat
Fratrem dextra Hector: contra Patroclus at audax
Arripuitque pedem assiliens, ad seque trahebat.
Interea circum duro certamine Troum
Ac Danaūm pubes omni pugnabat opum vi.
Quales adversi certant in saltubus olim
Montanis Eurusque Notusque evertere silvam
Ingentem; fagusque et duro cortice cornus, 940
Fraxinus et nutans immani turbine, longis
Mutua confligunt ramis, fissoque fragorem
Robore dant late horrendum; nemus omne remugit
Tales hinc Graji, pubes hinc Dardana pugnant
Urgenturque, urgentque: neque his fuga nota, nec illis.
Stabant multa solo defixa hastilia circa
Cebrionen, pulsae nervo et stridente sagittae;
Multa, manu valida contorta, immania saxa
Pugnantum clypeos pulsabant. ille jacebat,
Ingens ingenti spatio porrectus, in atro 950
Turbine pulvereae nubis, currusque volucres
Atque agiles flexus bellantum oblitus equorum,
Ac dum sol medium scandebat celsus Olympum,
Hinc atque hinc denso volitabant aerea nimbo
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
