Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-278 --
Belligeram, famulumque una, fulvo aere coruscos,
Turbatique animi subito, motaeque phalanges.
Quippe iras posuisse truces, et rursus amico
Sese animo dium sociis junxisse putabant 350
Peliden; trepidoque obiens circum omnia visu,
Quisque fuga optabat supremam evadere cladem.
Primus ibi ante omnes hastam Patroclus ahenam
Torsit in adversos, ingens ubi turba fremebat
Protesilaëam circum condensa carinam.
Certa volat, dextrumque humerum transverberat hasta
Pyraechmae, fortes qui Paeonas ex Amydone
Duxerat et pulchris, quos irrigat Axius, arvis.
Concidit, ac terram resupino corpore pressit
Ille gemens: socii circum fugere; perempto 360
Nam duce, praestabat cunctos qui Marte feroci
Paeonas, eximius late conterruit omnes
Patroclus, repulitque altis a puppibus; ignem
Et dirum exstinxit: navis semusta relicta est
Illic: turba Phrygum trepidabat versa tumultu
Ingenti: Danai instabant formidine captis,
Per curvas vasto effusi clamore carinas.
Ac veluti montis cum celso a vertice, lucem
Ille ciens subitam, nubes, nimbosque deūm rex
Dimovit; saltus apparent, ac juga late, 370
Diffusoque aperit caelo se fulgidus aether:
Sic, Danai curvis a puppibus igne repulso,
Exiguam nacti requiem curae atque laborum,
Nondum etiam pugna, sedato Marte, soluti.
Troës enim nondum pulsi omnes agmine verso
Terga fugae dederant, sed, Grajum urgente caterva,
Adversa obstantes cedebant fronte retrorsum.
Heic, acies ut se laxavit fusa, peremit
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
