Nil audis, sociosque tenes in puppibus usque
Invitos. patriae saltem, quod restat, eamus
Indecores ad tecta domus, demusque vocatis
Retro vela notis; animo quando incidit istaec,
Atque tibi atque tuis male noxia civibus, ira.
Haec saepe in coetu jactastis. nunc opus ingens
Martis adest cupidis. nunc vestrum promite robur
In Teucros, placitamque alacres invadite pugnam.
Sic ait; atque virūm succendit corda furore.
Arctius hi densant, audito rege, catervas. 260
Ac veluti celsas cum vir sibi construit aedes,
Aptans saxa manu, jungensque in pariete, flanti
Usquam per rimas pateat ne semita vento:
Sic densi galeas junxere, atque aerea scuta.
Fulcibant clypei clypeos, galeaeque micantes
Confertim haerebant galeis, densusque viro vir;
In conis et pulchra comantes mutua sese
Tangebant, moto nutantes vertice, cristae.
Sic illi denso stabant pone agmine; raptim
Ante viri duo se cingebant fortibus armis, 270
Patroclusque ac Automedon, saevo aere parati
Unanimes prae Myrmidonum pugnare phalange.
Ad sus festino tum se tentoria gressu
Magnanimus tulit Aeacides, arcamque reclusit,
Pulchram, daedaleam, gnato quam ferre carina
In celeri dederat quondam Thetis, ac dea totam
Complerat tunicis, laenisque arcentibus aurae
Frigora, villosisque tapetibus. heic patera olli,
Artis opus mirae, penitus conclusa jacebat;
Nemo virūm admorat cui labrum fervida potans 280
Vina, deo nulli qua rex libare solebat
Lenaeum laticem, dempto Jove. prompsit ab alta

Vade retro

Vade porro