Adstitit eximius gravibus bellator in armis.
Ast Hector, postquam Teucri tela irrita vidit,
Sic Troas Lyciosque affatur voce superba:
O Troës, Lyciique, ac pubes Dardana, nunc o
Este viri, vestramque alacres vim promite Grajas
Certatim ad puppes. vidi nanque irrita ab ipso
Facta Jove, his oculis modo vidi, fortia primi  
Tela viri. facilis nosci est mortalibus alti 610
Vis Jovis, aequus opem seu cum fert, ac decus auget; 
Sive aliquem premit irascens, atque abjicit idem:
Argivos ut nunc certe premit, ac bonus ultro
Nos juvat. o fortes, denso nunc agmine, ad ipsas
Nunc puppes pugnate, viri. quod cominus ictus,
Eminus aut siquis, fatalis venerit horae
Ad metas, leto domitus cadat; ac erit hostem
Arcenti dulci a patria cecidisse decorum;
Uxor et exstincto incolumis, natique manebunt,
Et domus, et patrii census, Argiva paternas 620
Hinc longe ad sedes fugiat si denique classis.
Talibus incendit vires ac pectora dictis.
Parte alia hortari socios non desinit Ajax:
Proh pudor! Argivi, praestat vel dura subire
Fata semel, Grajam vel rem servare, supremam
Et cladem, dirosque ignes arcere carinis.
An, miseri, spes est, naves ubi ceperit Hector,
Posse domum pedibus trans caerula vasta reverti?
Hectora non Teucros omnes clamore cientem
Auditis, furit igne cavas qui exurere puppes? 630
Non ciet ad choreas, at saeva in praelia pubem.
Nil melius nobis at quisquam suaserit, hosti
Quam conferre manus, tristique occurrere pugnae
Cominus. hoc certe praestat, semel ire sub umbras,

Vade retro

Vade porro