AD POTENTISSIMUM GALLIAE REGEM LUDOVICUM XVI EPISTOLA DEDICATORIA
paraDefectus Solis varios Lunaeque labores,
Astrorum et positus, naturam et luminis aurei
Per Latium Latiis olim celebrare Camenis
Aggrediens, veterum Parnassia numina vatum
Uraniem 1 et Phoebum de more in vota vocavi.
Ingentem Thamesis post inde advectus ad urbem
Aeratis impressa notis mea carmina primum
Eduxi totumque ausus vulgare per orbem
Direxi ad doctum docto cum praeside coetum,
Omnibus officiis qui me jam foverat atque
Sponte sua sociis socium adnumerare parabat.
para At modo cum gentes lingua regnante per omnes,
Francigenum 2 rex magne, tua jam reddita fulgent
Uberius cultuque novo se ostendere gaudent,
Ad te confugiunt unum, tua numina poscunt.
Jure quidem, quando Gallis commixtus et ipse
Dicor avi, Lodoice, tui jam munere Gallus,
In gentem adlectus magnam et tibi, maxime regum,
Devotus vivo, tanto sub principe felix.
para Tu facilis vitae succos per dona ministras
Annua; tu titulum praebes, tua nautica quo res
Adstrictum tenet ac geminato jure fidelem
Me jubet esse tibi, res nautica, quae maris altum
Jam tenet imperium, tanta vi mentis acutae
Instat et urget opus vigil ad tua jussa minister? 3
Aequoreis pater ipse stupet Neptunus ab undis
Nereidumque chori latitansque sub aequore Nereus
Gallorum ingentes tot ponto innare carinas
Fulmineosque globos emittere: fulgurat omne
Igne novo coelum et repetita tonitrua reddit.
Ipsi etiam nimbi tua jura sequuntur et hostem
Dispergit late navesque per aequora versat

Vade retro

Vade porro