Vicic, Kajetan (?-ante 1700) [1686]: Thieneidos libri sex, versio electronica, 5415 versus, verborum 33672, ed. Gorana Stepanic [genus: poesis - epica] [numerus verborum] [vicic-k-thien.xml].
Si vis in lexico quaerere, verbum elige et clavem 'd' in claviatura preme.
-- 91 --
Victoris meritum donis testantia, dicam.
18 O dona, o Coeli charites! quae gratia vincens
Angelicas dotes! sed Verbum dicere Verbo
Incipiam: Verbum Patris, qualem unica natum
Parturiit Virgo, divina Peurpera sacrum
Intacti pignus ventris, natalis in ipsis
Optatae noctis tenebris, manibusque tenendum,
Et labiis Caietano dedit amplexandum.
Noctem laetam! o nox lucis post fata beatae
Aequans delicias! tacitum stupet omnia pectus:
Virgo Thieneis natum deponit in ulnis:
Virgo Thieneas dignatur munere palmas,
Quo maius suprema beat nec Sydera lumen.
Nec mirum Angelicae quadam si forte laborent
Invidia mentes; potius si nulla Thieni
Invideat, stupeo: vester sol, gloria, splendor,
Coelestes animae, manibus lux vestra Thienis
Excipitur: repetita sui quas vota fatigant
Intuitus, stringit palmis, labiisque Thiene
Libat opes, quas plena suis diffusa labellis
Gratia distribuit. Sed quo fuit ordine gesta,
Aetherei series doni laetissima pandam.
19 Exurgit Latiis septem de collibus unus,
Armipotens queis Roma Sedet; dixere Qirites,
Exquilias: montem hunc Romanae Servius Urbi
Addidit, et veteres regum, de rupe penates
Tarpeia removens, isto rex Servius idem,
Regia construxit felici limina clivo,
Hic Ocrisiades subiectis aequa latinis,
Olim iura dabat; praestans nunc regia Matris
Virginis hunc animat collem, quo augusta suarum
Vicic, Kajetan (?-ante 1700) [1686]: Thieneidos libri sex, versio electronica, 5415 versus, verborum 33672, ed. Gorana Stepanic [genus: poesis - epica] [numerus verborum] [vicic-k-thien.xml].
|
