Et hanc vetustam, quam prope videtis, casam,
Propere – furore differor – succendite!
Istuc iugatim tot magistros mittite,
Nec noster ullam ferre scit furor moram!
Trahite feroces! Ista sit vestra pietas!
Dae: Quid, virgo, nostri numne sit Christus memor?
Nam nulla nobis plura discendi mora est.
Cat: Fidenter istis corpus ignibus date,
Mortale flammis quicquid est dissolvite!
Mens astra Christo transvolabit auspice.
Max: Hanc inde seduc, miles, virginem magam!
Obdurat horum cantibus mentem suis.
Caedatur intus flexili flagro cutis,
Nostri oculi ut isto gaudeant spectaculo!
Cat: Abeo, sed ista state constantes fide,
Nec vos ferocis Caesaris vis impotens
Perturbet! Alto rex deus solio videns
Certamen istud en coronas praeparat.

Previous page

Next page