Sop: Age, Caesar, illi profero munus novum,
Edisserendum grandiori pectore. –
Quum tollis omne, quod deus coli solet,
Heroas olim collocatos caelitus
Et clara caeli splendicantis sidera:
Quem nunc relinquis praesidem polo deum?
Quod nomen illi? Quaenam eum gentes colunt?
Cat: Quod nomen aliud soli et uni des deo?
„Deus“ vocatur quisquis ille praesidet,
Solusque quum sit, non eget cognomine.
Quotiesque sacrum nomen appellas dei,
Toties sonabis praesidem caelo et solo,
Toties creatis rebus auctorem dabis
Bonique fontem et omnium rerum basim.
Neque hic vocandus aetheris vis Iuppiter,
Lucisve Iuno, aut Pallas in sapientia,
Sed ubique solus haec dat atque unus deus.
Potensque cum sit omnium, haud sociis eget.

Previous page

Next page