Anonymus [1576], Tragoedia De fortissimo S. Catharinae certamine, versio electronica (), 1883 versus, Ed. Tilg, Stefan [word count] [anonymus-tragoedia-de-fortissimo].
-- -- Censeo patrandum: nulla vis cogat malum!
Sed nos inerme, debile mulierum genus,
Contra furores Caesaris quid possumus?
Tantisper illa sacra dum patrat furor,
Secreta solae inter domus penetralia,
Quod quimus unum, rite fundamus preces!
Cat: Debile repressit foeminae aviditas genus,
Adserpsit in stirpem inde muliebrem lues.
Hinc nos inermes, debiles omnes sumus.
Sed Christus antidoto luem istam sustulit,
Et posse dedit ultra impiorum arma et minas.
Nut: Quid hisce verbis, virgo, praetendis geri?
Cat: Infanda Caesar sacra cum praesens geret,
Certum est parantem voce coram carpere.
Confido, Christus coepta curabit deus.
Nut: Facinus, puella, non puellae dictitas!
Animus tyranni virginis molli sono
Trux non movetur: pone spem vanam, precor!
Anonymus [1576], Tragoedia De fortissimo S. Catharinae certamine, versio electronica (), 1883 versus, Ed. Tilg, Stefan [word count] [anonymus-tragoedia-de-fortissimo].
|