Quidni sit ergo Caesar ipse Aegyptius?
Cyr: Neglectus ante nunc Serapis cornua
Extollet et meliora tondet pascua.
Iam nunc Osiri, Anubidi et sacrae Isidi
Io imperator ipse restaurat sacra!
Aga: Os impium! Blasphema tu libamina
Monstris deûm dicata dictitas „sacra“?
Veniet dies, quando orbis isthaec arbiter
Severus olim vindicabit acriter,
Sibique Christus debitum asseret decus.
Dar: Eheu, mali quantum haec trahent sacrificia
Ter execranda, Stygis et pianda sulphure!
Heu quam cruentam, ut vereor, haec stragem dabunt!
Pis: Pro, magne rector siderum, tantum nefas
Non vindicas, inultum abire et hoc sinis?