Cer: Sic faxo propere, nemo ne indictum putet.
„Det lingua liberam auribus silens viam,
Fragore presso verba nec turbet loquax!
Haec est voluntas Caesaris ter maximi,
Quam nemo, ni sit capitis hic impos sui,
Contemnat audax negligatve nescius!
Solenne divis Caesar apparat sacrum.
Huc ergo quivis ordo praesens advolet,
Eques, senatus, plebs, sacerdos, pontifex,
Omnibus idem cum Caesare ut votum siet!“
Por: Sat est, parentur sacra hecatombes, pontifex,
Arasque pecudum pinguis imbuat cruor!
Neu sit iuvencum neu gravis sumtus modus!
Erga esse divos Caesarem largum decet.
Tantisper aulae tecta rursum visimus,
Mox prodituri. Compares illa interim!
Istuc perinde, tribune, comitatus para,
Romana ut isti quanta gens constat solo!

Previous page

Next page