Sic Phoebus olim despicatus Marsiam
Laniavit exesa cute humeris turpiter,
Pallasque Arachnen et Gigantas Iuppiter.
Ita quisque divûm numinis sui decus,
Quamvis cruenta comprobant per supplicia.
Et tibi faventes hac via reddes deos,
Si numen istud despicatum vindicas.
Max: Si me deorum numen ultorem petat,
Monstrabo in ipsos quantus ultor sim deos,
Si tamen, ut horum servo numen sedulus,
Sic ii vicissim regna confirment mea.
Ich: Hoc, Caesar, ipsi caelites tibi asserunt.
Max: Faxo igitur artes sentiat virgo has novas,
Postquam repugnat pertinaci pectore!
Huc, miles, illam dissecandam protrahe,
Et plebis alta voce vulgus evoca!