Andreis, Franjo Trankvil (1490-1571) [1515]: Ode in triumpho reuerendissimi atque amplissimi domini Ioannis de Lasko, archiepiscopi Gneznensis, de uictoria inuictissimi Sigismundi, Polonie regis, contra Moscos habito, versio electronica, 60 versus, verborum 294, ed. Bratislav Lucin [genus: poesis - oda] [numerus verborum] [andreis-f-ode.xml].
Si vis in lexico quaerere, verbum elige et clavem 'd' in claviatura preme.
-- 35 --
Ipse adest tandem Semeleius Euan
Inter adductas iuuenum cateruas,
Lincibus uectus uiridique cinctus
Tempora lauro.
Linus, Amphion leuibusque Apollo
Voculis aptent cytharas loquaces,
Vosque, Napeę, uarios, tenellę,
Spargite flores.
Buccina Triton uiridisque Nereus
Personet concha, pariter, falaces
Filię, longas choreas relicto
Ducite ponto,
Tuque, Troianę modo rapte in Idę
Vallibus, largum, puer, adde uinum,
Da Maroneum, potius uetustum
Funde Falernum.
Lesbios pleni sapiant racemos
Canthari, uel quę Corybantes edunt,
Massica antiquis resignata uasis
Consule Bruto.
Quisque pręsenti iubilet fauore,
Gaudeant omnes iuuenes senesque
Inter ardentes cyathos et almi
Pocula Bacchi.
Hunc diem gratis numeris canamus,
Cui quidem nullum est fere comparandum
Sęculum, raro positum supremi
Munere diui.
Andreis, Franjo Trankvil (1490-1571) [1515]: Ode in triumpho reuerendissimi atque amplissimi domini Ioannis de Lasko, archiepiscopi Gneznensis, de uictoria inuictissimi Sigismundi, Polonie regis, contra Moscos habito, versio electronica, 60 versus, verborum 294, ed. Bratislav Lucin [genus: poesis - oda] [numerus verborum] [andreis-f-ode.xml].
|