CroALa & LatTy: nodus

Nodus 47980 in documento sonhovius-j-catharinias.xml

Scena IIII. Maxentius – Galerius – Catharina cum suis: Pantaleon, Panticrates, Alexander, Leander, Bias etc. Postquam deum placavi magna numina, Pulcherrimae recordor ora virginis, Roseis diserta verba labris, quae mihi Paulo ante sonabat, gestu amabili et oculis, Stellantium instar siderum radiantibus. Abite, eamque vocate, quid velit ut sciam! Gal: Ad omne, Caesar, promptus obsequium feror, Quodcumque forti iusseris agendum manu, Eaque, quam tu comprobes merito, fide! Iam iam revertor, amabilemque Costida, Coram ut veniat, mecum simul deduxero. Sed ecce flos et nobile virginum decus, Ter amabilis illa Costis obviam venit! Salve serena, regio sata sanguine Costis decus inclytum Isiacarum virginum! Si sic placet, veni ut loquare Caesari! Cat: Christo duce et auspice veniam, amice, lubens. Praei! Max: O virgo, pulchritudine sidera quae poli Vincis rutilantia et aureum lunae decus, O inclytarum gloria prima virginum Et Caesare sponso digna praeter ceteras, Dic, quid tibi vis, vel quid boni desideras? Responde animo fac sis bono! Clementiam Te maximam decet experiri Caesaris. Cat: Unum est bonum, Caesar, quod expeto mihi Tibique pariter et omnibus mortalibus. Max: Fierine potest, ut ego bona plurima cupiam, Tuque unico contenta puella sis bono? Cat: Summum bonum, quod caetera bona continet, Desideriis ardentibus et flammantibus Solum expetendum censeo: nihil caetera Nisi huc relata, beatitudinis adferunt. Max: Quodnam istud est summum bonum? – Cat: Solus deus. Max: Quisnam iste deus solus bona omnia continens? Cat: Caeli rutilantis principium atque conditor Terraeque iacentis et procellosi maris, 867–69] A 478–80, C 557, 559. 877 duce et auspice] Hor. carm. 1,7,27. 883] Ter. Ad. 511 Bono animo fac sis. 887–901] C 730–40. IESUS, dominus dominantium, rex omnium Regum, gubernans omnia et omnia dirigens Summa potentia et insuperabili imperio. Max: O virgo, Christus, quem deum esse praedicas, Infestus hostis et inimicus est mihi. Proinde, cum tuae eloquentiae satis Nequeam facere aut responsa commoda reddere, Hac ampla et alta clausa teneberis domo, Donec quid agendum sit melius perspexero. Properate fortes armigerique milites, Deducite Costida in abditam procul domum, Vel squallidum, tetrum et tenebrosum in carcerem!