CroALa & LatTy: nodus

Nodus 1731 in documento reydax-i-epitome.xml

XXIX (1) Quàm miserabilis Urbis facies fuerit, qui oculis non subjecêre, animis concipere non possunt, nec alius, nî fugientes montium juga reciperent, se insecuturae calamitati subducendi patebat locus, quamvis et ibi amici praedones non abessent, qui fugâ etiamnùm pallidos, aut asperiori viâ fatigatos, vel pecuniis, vel alia supellectili exuerent;

(2) Nihilominùs custodia praetoria ad aedes salinarias, caeterae variis in portis stationes locatae, et nocte licèt intempestâ crebriori circuitione visitatae, Obiorum perquám multis salutem in aedium latebris quaerentibus;

(3) Altero manè tubicen adest, qui breviore sono inflatâ tubâ adventûs sui signum dabat, et validâ stipatus custodiâ in Curiam adductus Achillis nomine Alitophorum, caeterósque militiae Praefectos, qui etiamnùm in vivis superessent, sine cunctatione sibi restitui postulabat, minis adjectis, nî dederent fore ut incolis omnibus internecione deletis, igne ferroque Civitas depopulata solo aequaretur; Magistratus contrà in excusationem Urbis innocentiam afferre, caesorum numerum ignorari, reliquos verò in latibulis abditos longâ indagine investigandos esse;

(4) Haec inter laetus affertur nuntius, Rotamontium â Rusticis in nostram potestatem redactum, quò tubicen dimissus palàm edixerat, hoc tumultu â caepto consilio revocatum Achillem, aliàs indubitatò montem Urentium perrupturum fuisse, quare ingenti irâ commotum, vindictam animo coquere, non nisi incendia vomiturum;

(5) verùm et in superiori Oënovallensium districtu mutata rerum facies illuc Achillem avocâret, postquàm Linhenii Copiae Schinarcem et Schalutiam expugnarunt, et divi Martini promontorium Maximiliani Primi ascensu memorabile terreo aggere munire statuerunt, quare, ne intercluderetur Obiorum exercitus valdè jam mutilatus, illuc ab Achille eductus est, ubi propè Pagum Zirlensem acriter pugnatum, & si Obii Rusticis â tergo non institissent, hosti re infectâ cedendum fuisset, quare Damones altiora montium juga petere compulsi, Obio-Rutulis omnem viciniam expilantibus, et vacuas opibus aedes exincremantibus;

(6) Haec inter ex Urentio Monte nunciatum Dardanos sensim descendere, hostibus fugâ jam sublatis, & Pontopolin ad Achillis Castra reversis, quò fama penetraverat Losarium celebrem Dardanorum Ducem cùm aliquot millibus veteranorum militum per Stepuriam in Lotyris succursum properare, quare Achilles Castra mutare, et trans flumen in prato longitudine nomen sortito figere tuti existimans, stativa praetoria Hetingae metatus est,

(7) nocte verò appetente tantus in tentoriis ignis excitabatur, ut longiùs distantibus, et Castrensis ritûs inexpertis, tota Pontopolis continenti incendio ardere videretur, verùm sub horam secundam matutinam secundâ militibus vigiliâ universum exercitum Campolacum & Schinarcem movisse, paulò post compertum est; incredibile, quantâ trepidatione vasis collectis, et metu urgente fugam praecipitârint, adeò ut lintea Achillis supellex, et plura alia postmodùm inventa fuerint, à properantibus derelicta, gloriosâ in Lotyrim ingressûs pompâ in egressu repentè in turpiorem fugam conversâ; quippe velocitas juxta formidinem.Tacit. in German.

(8) Néque periculo regressus caruit, dum Achilles medius inter quendam Carensem Comitem & Allobrogûm Ducis Legatum equo incedens, â Venatore ad Sanctum Martinum habitante ex insidiis glande plumbeâ impetitus, sed qúoniam ob viae angustiam Carensis Comes primus equitabat, et nitidiori veste indutus erat, hic Achilles esse creditus, sclopo trajectus est, ut exanimis humi jaceret; minimè tamen probaverim dicterium eorum, qui venatorem aeque irridendum asserebant ac si aprum insectatus cornua gerentem jaculatus esset.

(9) Ità demùm Achilles praesentaneum vitae periculum, sed non ingloriae expeditionis notam, & inconsultae fugae ignominiam evasit; At prodigium erat, et opus Supremi Numinis, Deo nempè mundi infirma eligente ad fortia quaéque confundenda, undè non nemo vena suâ poëtica Oënovallensibus gratulabundus accinebat:

(10) Quàm gratus Superis, Vallis es incola! Pro quo belligerant Numinis agmina! Ac ad Vota tuos Virgo Puerpera Hostes aegide disjicit. Excitus Siculis Lemnius Ignibus, Ac invita viro juncta Proserpina, Cùm Plutone, focos suscitat igneos, Cocytúsque minas spuit. Ollis igniferis fercula praeparat, Quae nec Tartareus Cerberus exedat Instigante fame, sed vel Erynnides Foetentes revomant cibos. Lotyris pietas, agmina Supplicum. Coelo juncta manus, vota precantium, Avertêre minas, lacrima poenitens AEthnas mitigat igneos.