CroALa, 2024-04-29+02:00. Nodus 980195 in collectione croala.
Functio nominatur: /node/croala/980195.
XI. D. THOMAS AQUINAS IMPUDICAM MULIEREM TITIONE FUGAT. EPIGRAMMA 5.Stabat in invicta servatus Aquinius arce, Depositum sophiae caelitis, orbis honos. Ecce illi ante oculos (quem non petet atra libido) Constitit in media turre videnda Venus. Obriguit iuvenis primo poteratque videri Tam subitum flammis opposuisse gelu. Ut rediere animi: »Nusquam tibi gloria tanto Ausu erit, o nigri fex Acherontis«, ait. »Fulminibus caeli, queis te iam destinat ether, Praeludam in foedum flammiger ipse caput.« Dixit et ardenti torrem complexus ab ara Imprimit adversae terque quaterque lupae. Illa fugit, nigraque domus completa favilla Indicium victae visa dedisse Stygis. Macte animis Thoma; qui flamma teste probatur, Dici iure potest aureus iste pudor.