CroALa, 2024-04-29+02:00. Nodus 774153 in collectione croala.
Functio nominatur: /node/croala/774153.
Quae ripis fluit unda carens, sit limpida quamvis, Et celso montis vertice prosiliat , Disperit huc illuc migrans turbata; vel, imam Dum cadit in vallem, carpere nescit iter. Sed qua per tutum prolabitur unda canalem, It celeri cursu , vimque dat ipsa sibi; Fluctibus urgentur fluctus , quos cernere suave est; Et grato migrans obstrepit illa sono; Nunc flexo ludens, nunc recto tramite pergit; Nec cessat caelo liberiore frui. Hic mea languescit virtus, fluvioque videtur Consimilis , quem pars infima vallis habet; Quem sol exsiccat, quem stringunt frigora; sed te , Dum tua sacrato vellere membra tegis, Nobilis unda refert , caeli quae surgit ad auras; Sic tu felici tendis ad astra via.