CroALa, 2024-04-28+02:00. Nodus 767383 in collectione croala.
Functio nominatur: /node/croala/767383.
P. THOMAE NIGRI DE PROPRIETATE ET LAUDIBUS LAURI AC INSIGNIS LAURETANORUM.Laurus olet, redolentque rosae, Leonardus utrumque; Nam superat cunctas nardus odore rosas. Nunquam tacta polo Laurus nec fulminis ictu, Iupiter, aut telis est iaculata tuis. Semper, Laure, uires, uiridi nec in arbore desunt Grata rosis croceus ceruleusque color. Caesar fronde tua uictoribus atque poetis Et solet hac sacras cingere fronde comas. Grata uiris, dilecta deis uel Apolline teste, Gratior at Venetis qui tua serta gerunt. Tantum annosa cadis, tamen haec numerosa Quiritum Lauretana cohors mox pia damna leuat. Mox etenim totidem fecunda repullulat arbor Frondibus, Herculeus ut facit Hydra labor. Felix ergo locus quem uiuida Laurus obumbrat, Quem tegit umbriferis Laurus amoena comis.