CroALa & LatTy: nodus

Nodus 717730 in documento andreis-f-ode.xml

Ode F. Andronici in triumpho reuerendissimi atque amplissimi domini Ioannis de Lasko, archiepiscopi Gneznensis, de uictoria inuictissimi Sigismundi, Polonie regis, contra Moscos habito Grandis immensi pietas Tonantis, Gentis antiquę miserata casus, Post tenebrosas lachrimas metumque Postque procellas Reddidit clarum nebulis fugatis Lumen inuicto domino ducique Nunc Sigismundo placidoque regi Laude perenni, Cuius ingentes canimus triumphos Atque uictrices uiridesque lauros; Sub tuis, princeps, oculis et alis, Te duce, Laski, Turba Polonos uariis honores Laudibus tollit redigitque in astra Perstrepens plausu gracilique uoce Vndique in urbe. Ipsę Corr. ex Ipse montanę teneras corollas Simplices Nimphę manibus pudicis Ingerunt mensis uiolisque miscent Lilia plenis, Blanda nec restat Venus et Cupido, Gratię et Cynthi nemoris puellę Gentibus dulces meritis lepores Vsque citantes. Ipse adest tandem Semeleius Euan Inter adductas iuuenum cateruas, Lincibus uectus uiridique cinctus Tempora lauro. Linus, Amphion leuibusque Apollo Voculis aptent cytharas loquaces, Vosque, Napeę, uarios, tenellę, Spargite flores. Buccina Triton uiridisque Nereus Personet concha, pariter, falaces Filię, longas choreas relicto Ducite ponto, Tuque, Troianę modo rapte in Idę Vallibus, largum, puer, adde uinum, Da Maroneum, potius uetustum Funde Falernum. Lesbios pleni sapiant racemos Canthari, uel quę Corybantes edunt, Massica antiquis resignata uasis Consule Bruto. Quisque pręsenti iubilet fauore, Gaudeant omnes iuuenes senesque Inter ardentes cyathos et almi Pocula Bacchi. Hunc diem gratis numeris canamus, Cui quidem nullum est fere comparandum Sęculum, raro positum supremi Munere diui. Nulla uotiuis precibus sit absens Cura, libertas quoniam beata Parta Polono est, decus at patensque Gloria regi Vt mei multum domini uoluptas, Hosce qui splendens celebrat triumphos, Duret, ac tarde repetat, precamur, Lętus Olympum.