CroALa, 2024-04-29+02:00. Nodus 680190 in collectione croala.
Functio nominatur: /node/croala/680190.
Qualiter in anno domini 1657 nunc currenti, die secunda mensis Augusti proxime praeterita, honesta Barbara Matanich, Georgii Sissek consors, praefatam I. ad coenam invitasset, eademque absoluta, dum idem Georgius Sissek intra undecimam et duodecimam horam noctis praetactae diei e domo sua omnino intra muros et moenia dictae civitatis montis Graeciae, comitatuque Zagrabiensi existente, habita, foras exivisset, tunc in culina domus praemissae suae praefatam I. animadvertisset, et visibiliter vidisset una cum praefata uxore sua, et nescitur, quibus diabolicis artibus et magicis plena praestigiis et maleficiis praefata I. divini pariter et humani juris timore postergato, ignis flammam in foco culinae suae (alioquin igne ibidem pro tunc nullo prorsus existente) ac si ex
uno face ignis conceptus fuisset, edidisset et fecisset, ac illico ab inde domum praemissam eiusdem dicta I. introiens, candelam in eadem ardentem, arte similiter diabolica et magica extinxisset ; quibus praemissis praestigiose et magice ac venifice paratis disparuit; poenam super huiusmodi diabolicis artibus et magicis maleficiis ac veneficiis in generalibus decretis et novissimis etiam constitutionibus regni passim superinde sancitam incurrere non formidans.Unde peteret idem fiscalis civitatis montis Graeciae memoratam I. vigore praetitulatorum Decretorum et novissimarum Constitutionum et consvetudinum huius patriae in similibus observari solitarum veluti manifestam sagam et veneficam ac maleficam praevia certificatione coram praefatis, domino videlicet judice et senatoribus dictae civitatis montis Graeciae juri personaliter astare et de praemissis juxta erectam Actionem ex parte eiusdem I. judicium et justiciam debitumque justitiae effectivum complementum sibi impendi atque elargiri et pro fatendis reliquis sagis et veneficis ac maleficis earumque veneficiis et complicibus primum torturae adjudicari et subjici, ac tandem pro demeritis eiusdem I. eandem I. debitis poenis subjici in terrorem et terribile exemplum aliorum.
Datum in eadem libera regia civitate montis Graeciae Zagrabiensi, die secunda mensis novembris. Anno domini 1657. Lecta et correcta per me Stephanum Magyardy Civitatis praefatae juratum notarium m. p.