CroALa & LatTy: nodus

Nodus 539374 in documento andreis-f-epist.xml

Ad elegantissimum poetam et medicum D. Vadianum Tranquillus Parthenius. Quem decor et probitas, praestantia, gloria, virtus Et genus exornat, o Vadiane, tuum, Non ego iam blandis tua pectora culta Camenis, Non animi referam munera rara tui. Unica facundi tua gratia me tenet oris Attonitum miris sollicitatque modis, Non modo Tranquilli qua tu cor molle fatigas Et trahis addictum sub tua iura caput; Saxa sed et gelidos adamantas et ardua montis Culmina Riphaei Sarmatiamque trucem Flexissetque lupos, Hircanias denique tigres Et quae sub gelido terra Trione riget. Nostra igitur quoniam si versas pectora vates, In causa est probitas, gloria, Musa, lepos.