CroALa & LatTy: nodus

Nodus 360732 in documento natalis-f-carmina.xml

6. Quod rarius sine amore scribat Nondum saeua dei sentimus toxica caeci, Toxica Thessalicis deteriora malis; Pectoribus nondum uenenato cuspide telum Sensimus, horrendae uulnera militiae. Nostra Cupidineo nec adhuc summisimus oestro Colla; Dionaeas spreuimus usque faces. Scribimus iccirco rarissima carmina, Domni, Otia libertas nam mihi blanda facit. At mea si grauibus oneraret colla catenis Mollia quae Gnidon, quae Paphos alma tenet: Pagina multa mihi formaret nempe libellos. Tum legeres sacri carmina Callimachi; Tum mihi Naso foret superandus carmine blando Ipse Philetaeos consequererque modos. Historias molli narrarem carmine longas Ex pulice et liber surgeret Iliados.