CroALa & LatTy: nodus

Nodus 323330 in documento baric-a-stat.xml

§ 4 De ceteribus iuribus etc.

1.1 Dignitatum quarumcunque in Belgio nunquam et nulla obtinet haereditas, idque ex forma libera reipublicae. 2 Vicarius generalis inde a 47--o huius saeculi anno jure haereditario tenet dignitatem suam. 3 Titulus diversus est in Belgio pro diversitate imperantium; statuum generalium titulus conspicuus quidem est, sed simplex: nempe Hochmögende Herren Generel-Statten der Vereinigten Niederlanden: Celsi ac potentes vel praepotentes domini ordines generalis foederati Belgii; hos titulos anno '629. ipsi Belgae defixerunt; rex Franciae ipsos compellat Percari et Grandes Amici Confoederati; Hispania eos compellat: Domini Status Generales; interim ab anno '29. tribuitur ipsis ordinarius titulus Celsi ac Potentes; imperator primus fuit Iosephus 1. qui anno 10. huius saeculi dedit Belgis competentem titulum, vocula tamen Domini emanet semper; in contextu Euer Hochmögende, Vestra Potentia; Belgium vindicat sibi locum post reges et rempublicam Venetam, proin ante electores Imperii; hi tamen contrarii fuerunt, et obtinuerunt tacito consensu hanc praecedentiam.

2.1 Quod adtinet titulos speciatim provinciarum, status Hollandiae vocantur: Edle und Großmögende Herren, nobiles ac praepotentes domini; in aliis provinciis vocantur Edle und Mögende Herren, nobiles et potentes domini. 2 Vicarius generalis habet hunc titulum: Vilhelmus 5. princeps Aransionensis, comes Nassoviae S. R. I. princeps; marchio Vlisingae etc. vicarius haereditarius, generalis capitaneus et admiralis foederatarum Belgii provinciarum, praeses equitum et nobilium Hollandiae ac Frisiae occidentalis gubernator generalis Indiarum Belgicarum. 3 In contextu: Seine Hochheit, Votre Altesse, Vestra Celsitudo; antecessores Vilhelmi primi solummodo Excellentissimi Domini, Son Excellence, nominabantur.

3.1 Scutum Belgii foederati est leo aureus erectus in campo rubro, qui brachio dextro gladium tenet, sinistra fasciam 7 sagittis constantem. 2 Usque pacem Vestphalicam leo hic in capite habuit pileum libertatis, ab eo tempore vero coronam auream. 3 Antequam in libertatem fuissent asserti, scutum eorum fuit Pera mendicalis (Bettelsack), tardius navis

fluctibus agitata, et in periculo fluctuans cum inscriptione Incertum, quo fata ferent. 4 In monetis habetur scutum in parte antica, in postica miles catafractura indutus dextra gladium, sinistra fasciam tenens 7 sagitarum, cum hoc simbolo: Concordia res parvae crescunt.

4.1 Geldria habet scutum horisontaliter sectum, superior pars in duas areas dividitur; in dextro leo aureus in campo rubro, in sinistro rex niger in campo aureo; inferius est leo aureus in campo caeruleo. 2 Hollandia habet leonem rubrum in campo aureo. 3 Zeelandia habet scutum diagonaliter divisum, superius est leo ruber in campo aureo, pars inferior compluribus fasciis caeruleis et argenteis, undarum instar repleta est. 4 Utrajectensis: scutum est area argentea ducta linea rubra obliqua. 5 Frisia gerit 2 erectos congredientes leones aureos in campo caeruleo. 6 Transisalana habet leonem rubrum in campo aureo, per corpus leonis ducta est fascia caerulea non recta, sed undulatim assurgens. 7 Groninga habet aquilam nigram bicipitem in campo aureo, in pectore habet scutum rubrum per cuius transversum traps ! argentea ducta est. 8 Vicarius qua talis utitur scuto generali.

5.1 In Belgio archiofficia vacant, cum rex non adsit; vicarius enim pensionariusque Belgii sunt tantum officiales publici. 2 Ordines equestres non dantur aeque; quamquam ordo aurei velleris ex Burgundia ducat originem. 3 Metropolis in singulis provinciis habetur ea, in quibus status conveniunt quotannis; Haga comitum (Grafen Haagen vel Haagen) est metropolis communis; est autem tantum pagus, sed is ingens, magnus, splendidusque et elegans; adest in ea palatium nobilissimum, Princen Hof, a Vilhelmo anno 1250. aedificatum, et ab eo tempore exornatum; narratur quod ligna a saeculo 13. necdum sint a vermibus corrosa; in hoc palatio vicarius habet residentiam et status consident; alias potissimum in bonis suis in Silva Ducis residet; ibi residet et consilium status et camera rationaria, adest officina monetaria, et consilium bellicum, nec non sedes est omnium legatorum aularum exterarum.