CroALa, 2024-04-29+02:00. Nodus 301829 in collectione croala.
Functio nominatur: /node/croala/301829.
22. Andreae Tifernati responsumEst arbor, quae serpit humi, quae uertice lambit Sidera, quae medio est conspicienda loco, Et cuius facile est imis decerpere ramis Quae folia autumni frigore lapsa cadunt. At medios fructus tempestas atra fatigat, Aere quos medio magnus adire labor. Quo mage desperes fastigia tangere, ni te Demisso sursum numina fune trahant. Hunc funem exoret uirtus tua, quo nisi fretus Praepetibus pennis Icarus alter eris. Vt tamen euadas super alta cacumina tutus Et carpas facili poma petita manu, Tendo preces et uota libens: hanc suscipe dextram Quae tibi diuinam fida ministrat opem.