CroALa, 2024-04-29+02:00. Nodus 247152 in collectione croala.
Functio nominatur: /node/croala/247152.
31.Immodica imperii censusque immensa cupido Gradivi laudem postquam sic fata fuisset, Ambitio malesana istam sic voce secuta est: “Fata instant, pereo tristis, nisi grandior ornet Me cumulus titulorum; quae me prisca vocari Gloria nominibus multis facit, alget inanis Vox, nisi quaesitae maiora vocabula famae Accedant. Resides animos ferrique paventes Spernit honor dextras, plorans neque pectoris imas Dissimulat pupilla faces, non caeca superbas Regnorum quas orbis habet spectare secures Roboris ignaras nostri, quae nomina mille, Mille meis possent titulos praebere triumphis. Me, Macedo, tua fama trahit, tua gloria, Caesar, Et tua, Pompei; mentem tua, Scipio, laurus In sublime rapit: vobis dedit Africa nomen, Armenia, Assyriae, Pontus, prostrata Saguntus, Atque Numantini cineres sparsere serenos Nominis aeterni radios, laudumque perennes Inscripsere notas, victuri praemia Martis. Par laudis famaeque mihi praecordia calcar Affectumque fodit; summae petit ardua famae Non socors animus: vilis stupidusque probatur Qui sanguis pulchri flammis non bullit honoris. Marte uti me fata volunt, quo numine solo In decus et nomen claris ascenditur ausis. Quae modo pax mundi est, blandiri mollibus aptam Esse satis notum est animis, sed fortibus hostem. Pro titulis famaque nihil studiosa valensque Moliri soboles, fatis praesentibus ortam Desidiem putet esse deam, quae ignava Gradivum Expulit atque alio proscriptum detinet orbe. Ingenii agrestis dea servilisque propago! Hanc ipsam extorrem faciam! Petere ardua montis Caucasei cogam! Reduci concedat apertos Mavorti campos, urbes et rura, serendis Pro laudum titulis et honorum messe iubebo!” Haec tulit insana Ambitio; plausere loquenti Ira et Avarities iunctisque in mutua dextris Foedera, captivum statuunt exolvere Martem. Quod pepigere nefas, modico post tempore factum est.