CroALa, 2024-04-29+02:00. Nodus 246030 in collectione croala.
Functio nominatur: /node/croala/246030.
19.Haec et plura suae dixit referentia prolis Susceptae seriem: media quod noctis opacae Distaret cum parte dies, caeleste tulisset Alatus legatus ‘Ave’, sociale volantum Aligerûm saeptus turmis flammisque vibratae Circumquaque velut lucis turbata fuisset. Utque metum crescentem animi, mentisque pavorem Ponere iussisset Gabriel sobolemque Tonantis Aeternam, membrorum avidam compage teneri Rettulit atque sui thalamum deposcere ventris, Seque viri ignaram cum fando reponeret, Ales Numinis, ignaramque viri “Divina parentem Progenies habitura tuos desiderat,” inquit, “Virgo, sinus!” Seque imperiis servire Tonantis Dixit ut ancillam; subito sua viscera proles Implevit divina, artus fabricante beato Flamine, censo animi, nequiit quem dicere, raptu. Hic defixit humi vultus et lumina Virgo Et siluit rubefacta genas colloque caducam Ut rosa sub lucem, caput inclinata pependit.