CroALa, 2024-04-29+02:00. Nodus 242091 in collectione croala.
Functio nominatur: /node/croala/242091.
16.Sidereae mentes carnisque ignara potestas Inventum mortale stupet maiusque beatis Caelitibus robur, quibus hanc sine corpore palmam Carpere laus minor est: plus est si victor acerbo Hoste tenus veniens socia de carne triumphet. Aut potius tantas caelo cecidisse pudoris Terrigenis mirantur opes interque maritos Integra quod fervoris inops nix albicet ignes. “Quo fine incipiet terreno in pulvere tanta Spectari virtus? Quid tanta in labe iugalis Protendit candor? Donum terrena voluntas Quo merito caeleste gerit? Num forsitan instat Progenies non carnis inops, sed carnis abhorrens Principium venientque novi sine semine partus?” Talia dicebant superi, queis dicere necdum Virgineae dederat Numen mysteria taedae. Attamen ut veteris perimendae gratia noxae Innotuit, didicere omnes a Virgine nupta Auspicium, saeclique decus prodire futuri.