CroALa, 2024-04-29+02:00. Nodus 239533 in collectione croala.
Functio nominatur: /node/croala/239533.
26.Iam nova Virginei Iosippo flamma calebat Addita connubii, pigros ut ferret Eoi Solis equos tardare diem tempusque cupiti Foederis, astrorum lux importuna teneret. “Memnonias,” inquit, “cur tandem, Aurora, fenestras Non aperis, cur non, Titan oriture, relinquis Eoum superasque salem, cur sidera lentis Volvuntur casura globis? Necdum aethere signa Atlantea cadunt et necdum Taurus ab alto Praecipitat meliusque sui vi ponderis astrum Sublevat adversa pandens nova lumina sphaera?” Talia, ubi necdum desissent noctis opacae Scintillare faces, animo volvebat Ioseph. Mitior illorum calor est leviorque cupido, Virginitas quorum moritura iugalibus ardet Ad prolem thalamis; multo minus aestuat ille Pacta iuventa tuis accensus amoribus, Hymen, Iosippo aeterni numquam violanda pudoris Quam caleat concepta fides. Quas pronuba caeli Gratia vult taedas ardere, potentius urunt, Quam terrena quibus dat parca alimenta voluptas.