CroALa, 2024-04-29+02:00. Nodus 1683109 in collectione croala.
Functio nominatur: /node/croala/1683109.
Ioannes Gotius reverendissimo in Christo patri domino Thome, electo Agriensi et supremo regis Pannonici cancellario s. d. Legite Pannegyrim nostram, reverendissime domine, invictissimo regi nostro dictam. Tua enim dicatura est et tue
censure castiganda committitur. Quam si recognoveris, sinas eam ingenii tui face illustratam, quoquo traxerit impetus, abire. Nullas enim livoris notas expavescet gerens vexillum gravissimi iudicii tui. Imitabitur profecto strennuum militem, qui sub maximo duce, bello eciam et armis peritissimo, militans audacius hostes aggreditur. Difficile est, hercule, causam pupillo absque patrono tueri. Te itaque hec ingenii nostri recens genitura et cupit patronum et mirum in modum exposcit, que si tibi placuerit, non poterit amplius in summa arce posita vel inimica acie oppugnari. Gaudebit profecto e tuo sinu Socratico missa fieri peregrina et diversarum gencium incola. Si per te vitam capiet, tibi debebit et tanquam in tuo penu nutrita durabit nec unquam in senium verget. quis enim te doccior , quis in sacris studiis sublimior,quis in omni vite colore (ut omittam fidem et integritatem, precipuas virtutes tuas) prestancior, quibus sane ornamentis cum apud omnis terrarum principes maximam es auctoritatem consequutus, tum in primis apud augustissimum regem nostrum eo loci habitus es, ut te quidem tanquam precipuam ac tutissimam arcanorum suorum erigeret arcam et sanctiret efficeretque, ut tu in vinea sagax simplicitate sui pectoris, taciti quidem, ima volveres et ardua curarum eventa susciperes et regni demum pondera librares. Quid quod eciam nobis perspectum sit, quantum sis reipublice nostre studiosus quantumque nos omnis diligas amesque, exploratum habeamus. Iccirco et colit te civitas nostra et iure quidem veneratur maximum namque in te salutis sue presidium posuit ac locavit. Ceterum facito me principi nostro invictissimo commendatissimum, rogo, qui es apud principem merito eminentissimus.Vale, decus nostrum et maximum ornamentum, et me utere ad votum.