CroALa, 2024-04-28+02:00. Nodus 1674918 in collectione croala.
Functio nominatur: /node/croala/1674918.
Reuerendo in Christo Domino Iacobo Grassolario, domino meo, plurimum honorem. Venetiis. Iacobo Grassolario Marcus Marulus salutem. Cum scriptorum meorum studiosus, optime uir Iacobe, cures inprimis cum impręssoribus Tuis, ut illa in lucem ueniant, exegisti, ut hęc etiam commentaria, quorum de imitatione Christi titulus est, ad Te mitterem. Tu, si dignum opus publica impressione iudicaueris (plurimi enim facio iudicium Tuum), cura, ut imprimatur! Mercedem siquam a Domino pro labore mereor, Tecum partibor. Ius fasque enim est, ut, sicut, qui bene beateque uiuendi disciplinam conscribunt, pręmii aliquid a Deo expectant, ita idem et illi sibi sperent, qui eam publicandam curant.
Ista, quę nunc mitto archetypa nostra, postquam impręssorum typis exscripta fuerint, nobis restitue, simul etiam aliquot exemplaria Euangelistarii nostri ad me mitte meque Francisco Lucensi nostro, cui ipsum Euangelistarium iampridem dono misi quique plus etiam remisit, ne ingratus uideretur, plurimum commenda!
Vale, et cum ista impręssa fuerint, alia expecta! VIII. Kalendas Septembres.