CroALa & LatTy: nodus

Nodus 1651745 in documento zamagna-b-hesiod.xml

IOSEPHO SPERGESIO PALENTIAE BAR. EQV. S. STEPH. HVNG. R. AVG. A CONSILIIS IN AVLA VIENN. PRO REBVS ITALIAE ELEGIA Hellada iam linquens romano indutus amictu Nympharum ille ingens cura Heliconiadum, Cui niveos quondam pascenti in collibus agnos E viridi lauro sceptra tulere deae, Labraque Hyantaei sparserunt fluminis haustu, Vt liquido flueret dulcis ab ore sonus, Antiquumque Chaos, magnorum et nomina divum Diceret, et veterum saecula terrigenum; En tibi se vates, Spergesi candide, sistit Ipsarum missus Pieridum monitu. Namque ego laurigero musas in monte petivi, Pro officiis aliquod munus ut innumeris Mi placidae innuerent, quo tu laetatus adepto Laudares memoris pignus amicitiae. Diis placuit mens grata: haud irrita vota fuere, Orantem at fidis auribus audierunt, Ascraeique senis iusserunt carmina divae Graia per Ausonios ferre novata choros, Iustitiam queis ipse docet, morumque pudorem, Quantaque proveniunt parta labore bona: Sidere quo melius pingues invertere glebas, Seminaque inverso tradere sparsa solo? Quo freta non metuit cupidus mercator adire, Ac vehere externo litore divitias, Pacis opus, magnos vitae mortalis in usus Concessum a sancto numine caelicolum. Ipse etiam Clypei referet mirabile textum, Quod tenuit virtus Amphitryoniadae, Quum nemore in sacro Phoebi Pagasaea per arva Cycnum alto stravit vulnere Martigenam. Tu dextram nunc tende seni, firmaque coactum Te coram insueto fundere verba sono, Illa vetus clarat latiae quem gloria linguae Aurea, Iulaeis aemula temporibus, Pura tibi quae sponte fluit: ceu rivus ad ipsum Quum fontem illimi prosilit e scatebra, Pellucetque vitro similis nitidoque electro Formosis clarum Naiasin in speculum. An miserum eiicies, mutato gutturis usu Si male quod verbum dixerit asperius, Nil patiens perferre, tuis nisi sensibus aptum? Atqui nec talem fama mihi retulit, Nec te ego sum toties expertus. quin mage leni Quemnam finxerunt ingenio Charites, Et mage certantem sibi lectos iungere amicos, Servare et iunctos omnibus illecebris? Tu mihi magnanimae reserasti limina Matris Nullis florenti laudibus aut meritis; Tu dignum Augustae fecisti munere dextrae, Quum primum nostro nomine Moeoniden Illi offerre ausus de me es bene multa loquutus, Queis spes affulsit certa patrocinii Nec sterilis nec parva: a te sunt omnia primo Commoda, sunt nobis omnia nata bona; Et venient maiora, animum ni lusit Apollo Saepe mihi de te grandia pollicitus. Quamquam ego quid cupiam maius? non divitis auri Me sitis, aut agitans excitat ambitio. Talia, quos ridens tollit fortuna, sequantur; Non ego, qui didici parcus amare modum, Virtutique magis, caecae quam fidere divae, Quae levis assiduas versat agitque vices. Mi sat erit, liceat si quando carmine digno Ingens Austriadum tollere ad astra decus, Matris et Augustae magnum vulgare per orbem Largificum et nullis casibus edomitum Illum animum, late quo splendet ut aetherius sol Spicula virtutis clara procul iaciens Omnigenae, oceani trans vasti litora ad usque Terrarum extremos parte ab utraque polos. Caesaris huic magni certabo adiungere nomen, Cuius facta olim ferre per ora virum, Seu pacem, seu bella gerat, fama ipsa negabit Lassato alarum posse ministerio; Atque alias centum linguas, alia ora reposcet, Voto queis valeat fida satisfacere. Addam illi socium, cui nuper ab aethere lapsa Relligio sacro cinxit honore caput, Imperiumque dedit duplex, quo sceptra potenti Iustitia ac divum credita templa regat Idem regnator populorum, idemque sacerdos, Idem Teutonicorum inclyta fama equitum. Addam alios fratres, quorum iam munere tellus Itala cum magno foenore laeta videt Surgere Atestinos et Mediceos heroas Caesareis mixtos sanguine connubiis. Danubium ad vestrum rumor feret, aurea late Tempora Saturni nostra per arva patris Fulgere, et Insubrum campis florescere Athenas Omnibus eximias artibus et studiis. Gaudebit tuus ille heros Chaunitius, Atlas Qui catus Austriacum sustinet imperium; Tuque idem gaudebis, amor quem Palladis almae Cultorem doctis coetibus adnumerat, Quemque Italae commissa rei tam cura fatigat Vsque nova ingeniis addere subsidia. Iamque omnes duce tanto agitat vigor, omnibus urit Gloria honoratis corda cupidinibus Ex humili tellure alto consurgere caelo Laude aliqua, ut de se fama loquatur anus. Hoc etiam quod prodit opus nunc cumque, pusillum Sit licet, et foeda barbarie horridulum, Auspiciis hoc nempe tuis et nomine tutum Num metuat doctos tendere per populos? Non, ita me servent musae, timet. ergo age segnem Rumpe moram, i fidens culta per ora, liber. Nam tibi si laudem Spergesius annuat ullam, Sic quoque mutata veste legere diu. Annuet. illum autem quem tu bone cumque probaris, Et Charites vatem Castalidesque probant. Sic tibi et Hesiodus vivet donatus, et una Vives, Spergesi, cultus honore mihi; Nullaque me seclis obliviscentibus aetas, Spero equidem, ingrata mente fuisse feret.