CroALa, 2024-05-08+02:00. Nodus 1615348 in collectione croala.
Functio nominatur: /node/croala/1615348.
О plena tristi mortis imagine Humana, durum vita negotium, Assueta distinctos acerbis Ducere funeribus triumphos! Tu laeta moestis gaudia luctibus, Maestosque ludus laetitiis fugas, Passimque commisces amara Cecropiis aconita succis. Quis turbo, qui te fulminis impetus Aequet volantem? praecipitant dies, Annique vertentes, nec ulla est Sat rigidis brevis hora Parcis. Nil sceptra quidquam regia, nil decus Claro ebriarum murice vestium Prosunt, nec eversis superbi De populis spoliorum acervi: Nihil secundus rumor, et inclytum Nomen, faventumque aura Quiritium, Fascesque, lictoresque, et alta Nobilium series avorum: Nec summus imo discrepat, omnium Immitis aeque saeva necessitas Metit rapaci colla falce, Aggerat et miseros beatis. Virtute sola fati adamantinas Frangente leges. Illius in latus Nil sortis adversae, licetve Persephona jaculis malignae. Haec te erudito in pulvere splendida Juni laborum exercuit indole, Vulgi recusantem profani Gaudia, degeneresque curas. Haec docta sacri pectora Numinis Replevit haustu, non alii dato: Quo fretus audacem Deorum Coetibus insereres Camoenam: Haec nomen atri funeris inscium Dedit, perennis cum strepitu lyras Late volaturum per aures Illyridum populorum amicas.