CroALa, 2024-04-29+02:00. Nodus 1453021 in collectione croala.
Functio nominatur: /node/croala/1453021.
XXXI.
Illyr. Cemuje svjechja, kad nje occi?Quid caeco cum lucerna?
Alauda excaecata.
Auceps ad ignem, bruma dum saevit rigens, Proli fabellas enarrabat parvulae. Reticula, pedicae, viscataeque virgulae, Suo quibus aves praedabatur tempore, In humilis casulae servabantur angulo. Heic excaecatam, dulcibusque idoneam Alaudam volucres allectare cantibus Posuerat: ardens illustrabat vivido Fulgore tectum lampas: heic et tritici, Miliique larga grana spargebat manu. At caeca volucris inde rostro carpere Nil quibat: aliae, quae videbant, et suam Partem vorantes sese opimabant Aves. Alauda macie contabescens in dies Magis magisque singulos, tandem fame Exhausta periit in ciborum copia. Mens animi longis obvoluta erroribus Rationis alma frustra illustratur facie.