CroALa, 2024-04-29+02:00. Nodus 1446752 in collectione croala.
Functio nominatur: /node/croala/1446752.
XI.
Illyr. Kako rillo, tako i dillo.Qualis ore, talis opere.
Mustela alpina, et Sus.
Alpina proprio quae vocatur nomine Mustela, amictam pelle quam percandida Natura voluit, quamque sic coenum inquiunt Horrere, pluviis ut diebus e suo Cavo recuset, ne se turpet, egredi, Cum forte primum grunnientis horrida Suis videret rostra, quasque corpore Setas in atro subrigebat hispidus, Offensa formae faeditate nausea Se permolesta sentiebat affici. Sus excavabat interim rostro solum, Radicibusque cum replesset erutis Ventrem, lutosa forte quam reperit ibi Prolutus unda, coepit in eodem luto, Sua ut beatus sorte, circumvolvier. Mustela factum turpe dum considerat, Dixisse fertur: qualis huic rictus, sua Et facta talem luculenter exhibent. Plerumque quaedam corporis deformitas Solet esse morum juncta turpitudini.